Fahrah unau pahnih hi rethei takin a pu hovin an khawsa a, a u zawk chu Zama niin a nau zawk chu Mawia a ni. Chutianga an khawsak mek lai chuan anmahni enkawltu an pu chuan a thihsan leh ta thut mai a. Zama te unau chu tleirawl mai anla ni. A u chuan Mawia chu fa ang maiin a enkawl zui a, eizawnna ngelnghet zawk siamsak tumin a rem rem a thawk a, inhlawh ve pawh phal lovin lehkha a zirtir thin.
Mawia pawh chu zirna lamah a tluang chho hle a, a thawh rah ngeia hna hmuh tumin theihtawp a chhuah ve reng a, chutih mek lai chuan Zama chuan thawhpui thar a chhar a, mi hausa leh thil tithei tak a ni. Zama chuan a thawhpuipa chu a nau hna zawnpui turin a ngen a, a thawhpuipa chu Sorkar hotute lamah pawh alo tlatlum ngang mai. Kar lovah Mawia chu Police-ah an thun a, a ute ruahmanna erawh Mawia chuan a hre ve reng reng lo thung.
Zama te sumdawnna chuan thuneitute mit a tikham tan a, Mawia erawh dik taka hnathawh duh mi a ni. An unau chuan nun kawng chhuk chho harsa takin paltlang dun mah se, hmalam heisei dan inpersan tak avangin an hmathlir a dang chho telh telh a, an kawng zawh inang lo tak avang chuan an dinhmun a inep lo thei si lo. Harsatna atanga amah leh a nau khaichhuak tura a u beihna chuan chhia leh tha thliar hlei thei lovin a siam a, hmangaihna dawngtu, a nau chuan kut kawl nen alo hmuah a ngai dawn em ni???
